Hermon Onkruid Vasvra 2013

Ek het in een van my vorige blogs verwys na my regte werk.  Hierdie afgelope naweek was daar weer 'n geleentheid wat indirek te doen het met my regte werk.  Ek is baie bevoorreg om in 'n posisie te wees waar ek op verskillende kommitees dien.  Die afgelope 6 jaar is ek op Hermon Landbouvereniging se bestuur en die laaste 4 jaar die sekretaris.  Dit gee mens die geleentheid om baie intensief betrokke te wees by hoe so 'n organisasie funksioneer.  Hermon Landbouverening is een van die mees aktiewe en operasionele organisasies waarby ek betrokke is.  Dit is 'n unieke groep produsente en baie betrokke by die gemeenskap.  Dis 'n baie tradisievaste vereniging met ongeveer 8 byeenkomste per jaar.  Meeste van die vergaderings vind plaas by Hermon Hotel - 'n bymekaarkomplek met sy eie boek vol stories!

Op Saterdag, 17 Augustus 2013 was dit weer die beurt van die tradisionele Onkruid Vasvra (Rally).  Die dag is vroeër jare deur die destydse koöperasie aan die produsente gebied in die vorm van 'n rally.  Jy het gery van plaas tot plaas en die manne se plase besoek en na trekkers, parte ens. gekyk.  Jy moes dan meganiese vrae beantwoord en wenners is aangewys.  Hierdie was die oorspronklike byeenkoms.  Hierdie formaat het uitgesterf en die dag het doodgeloop.  In die 90'er jare het die manne weer die byeenkoms afgestof en die Hermon Boerevereniging Onkruid Rally het ontstaan.  Die dag was altyd 'n groot hoogtepunt op die kalender.  Die nuwe formaat was dat vrae by spesifieke punte op koringlande uitgewys word.  Daarheen word dan "gejaag" en vrae moet beantwoord word.  Vrae het gegaan oor watter tipe onkruid by die spesifieke punt staan en waarmee dit beheer kan word, asook algemene kennis vrae oor die distrik.  Die wenner was die span met die meeste regte antwoorde in die vinnigste tyd - 'n regte Rally!  Verskeringseise het veroorsaak dat die formaat weer later verander het en die tydtoets is afgeskaf (daar was van die deelnemers wat te entoesiasties geraak het).  Dit bring ons nou by die hedendaagse formaat.

Elke landbouvereniging doen sekere dinge om fondse in te samel.  Hermon Landbouvereniging gebruik die Onkruid Vasvra.  Ons vra al die organisasies waarmee ons besigheid doen om 'n bydrae vir die dag te maak.  In ruil daarvoor kan hulle kom uitstal en die dag met hulle kliënte sosiaal deurbring.  Hierdie jaar was geen uitsondering nie.  Organisasies het nie geskroom om 'n bydrae te lewer nie.  Martin Jooste Landboubemarking wat my Nexus kollega is, was die hoofborg van die dag en het deur Wildboar Catering (Marius en Ursel Wagener) gesorg dat almal genoeg te ete en drinke kry.  

Die dag is bygewoon deur 75 mense waarvan 54 die roete gery het.  Vrae word by punte op verskillende produsente se plase gevra.  Aanwysings na die punte word met die wegspring aan deelnemers gegee en die roete word gevolg.  Die deelnemers kry dus die geleentheid om verskillende plase te sien in die ongeveer 40 km roete wat gery word.  Op die ou end van die dag word vraestelle "ingegee" en gemerk en 'n wenner word op 'n prysuitdeling aangewys.  Vanjaar was die wenners (ook die verdedigende kampioene) Deon Steyn, Nelius van Santen en Van der Bijl Brink.  Daar is natuurlik baie pret op die dag met spanne wat gediskwalifiseer word weens verskeie redes (onwettige telefoon oproepe, handboeke, Google, ens.)  Na afloop van die prysuitdeling kan almal die dag verder geniet.  Vanjaar is ons bederf met 'n lekket T-been biefstuk deur Wildboar Catering.

Die eintlike "sports" begin eers na ete.  Dis dan wanneer die manne hulle voertuie bietjie vuil maak.  Vanjaar was dit ekstra vuil!  Hulle maak "doughnuts" en sit vas en doen al die dinge wat hoë testosteroon vlakke 'n man laat doen!  Gewoonlik word hierdie dinge gedoen met 'n groot skare en met al die nodige aanmoediging.  Vanjaar se Onkruid Vasvra was weer 'n reuse sukses en Hermon Landbouvereniging wil graag al hul getroue borge bedank vir die volgehoue ondersteuning.

Vir nou is dit weer terug na die oefen.  Verlede week was ek bietjie siek gewees en ook al die reëlings met die boeredag het maar redelik tyd gevat. 

Groete,
JG